الوسوم

إلى هيثم أبو خليل…

//

هي دي مصر يا هيثم

هاتوا لي بلد زي مصر…

//

مصر هي الشرف… والنضال والصحافة الحرة..

مصر هي ذكاء عيون أولاد المدارس بالمريلة الميري..

مصر هي سيد درويش وأم كلثوم وأحمد فؤاد نجم..

مصر هي الأزهر ومحمد رفعت وجامع السلطان حسن…

مصر هي الكونسرفتوار والمعهد الديني ومدرسة الراهبات…

مصر هي أذان الفجر صوت وصورة في سيدنا الحسين…

مصر هي القلعة وفم الخليج ومنارة إسكندرية… والسد العالي…

مصر هي الهرم… ومعبد الكرنك… ومترو الأنفاق…

مصر هي القصر العيني … ومعهد الكبد.. ومركز الكلى…

مصر هي هيئة الطاقة النووية… ومركز البحوث …ومجمع اللغة العربية

مصر هي مبرمجين عباقرة ومهندسين مبدعين.. ودكاترة ما جبتهومش ولادة

مصر هي صنايعية جامدين قوي وأسطوات حريفة..ى

مصر هي أطيب فلاحين وأشرف صعايدة و أذكى سواحلية..

مصر هي الصحفيين الشرفاء والمفكرين العظام والمدونيين الأحرار

مصر هي كأس الأمم الإفريقية… وحسن شحاتة و محمد أبو تريكة

//

مصر هي رأفت نخلة بيفطر في رمضان مع عم مصطفى..

مصر هي قرطاس ترمس على الكورنيش

مصر هي فندق العلمين وقصر محمد علي..

مصر هي كيلو سمك مشوي في أبو قير..

مصر هي القناطر الخيرية… وترعة الإسماعيلية… وبحيرة ناصر..

مصر هي ساعي المصلحة بيضحك وهو بيحط الجنيه في جيبه..

مصر هي الشاويش واخذ جنب وبيفطر ساندوتش فول

مصر هي المجند الدفعة اللي بيتشعبط فوق القطر

مصر هي أم بدوي بتطش الطعمية في زيت ما اتغيرش من شهرين

مصر هي عسكري بيرفع العلم فوق سينا… وبيفتح الحدود لأخوه الفلسطيني

مصر هي شلبي بينادي ع البت حميدة تقابله ع القمة…

مصر هي جمالات بترمي ميه ع العيال من البلكونة…

مصر هي كيلو فسيخ مبطرخ … وفحل فصل … وكوباية شاي حبر

مصر هي مركب بمجدافين وسط النيل..

مصر هي الجرسون بيقول الزبون: خليها علي المرة دي…

مصر هي

//

مصر هي ميكروباس زحمة… وهي ليموزين فخم على كوبري ستة أكتوبر..

وعيادة تأمين صحي… بتخدم عشرين مليون..

وطابور عيش طويـــــــــــــــــل….

ودعاء ليلة القدر في جامع عمرو بن العاص…

//

مصر هي مستشفى الشاطبي..

وشط العصافرة…

والمنتزه برضه…

مصر هي الملاية اللف..

وهي السواريه والاسموكن

//

مصر هي الغالي والرخيص..

مصر هي الغني والفقير…

مصر هي المدينة والنجع…

مصر هي النظيف والوسخ…

مصر هي القديم والجديد..

مصر هي الكبير والصغير..

مصر هي الحلو والوحش..

وما فيكيش حاجة وحشة يا مصر..

//

مصر هي مارينا وهي الأنفوشي…

مصر هي 10 رمضان: المعركة والمدينة

مصر هي 6 كتوبر: النصر والمصانع

مصر هي السكة الحديد وهي الطريق الزراعي

مصر هي السيدة زينب وهي مدينة الرحاب

مصر هي لوكاندة الفردوس وهي الفور سيزونز

مصر هي قناة السويس وهي توشكي

مصر هي ساقية الصاوي وهي الأوبرا

مصر هي مدرسة السنية وهي مدرسة الليسيه

مصر هي دار القضاء العالي وساعة الجامعة والقصر العيني

مصر هي الشيخ الشعراوي والغزالي والقرضاوي

//

مصر كلها بتاعتنا… مش بتاعتهم

مش هانسيب أي حته منها لأي حد..

 

مصر باللي فيها واللي عليها بتاعتنا احنا

… مش بتاعته ولا بتاعتهم

لو بيوتها متربة ها ننفضها…

لو شوارعها مكسرة ها نصلحها..

لو صوتها مبحوح هانديها يانسون…

لو ايديها مكسورة ها نجبسها…

لو عندها برد ها نشربها عسل ولمون..

لو بتزك ها نسندها..

لو ناسها زهقت ها نطبطب عليهم..

لو علماءها طفشت ها نرجعهم…

لو عيالها جعانة ها نشبعهم..

//

مصر مش عيلة…

مصر مش شلة حكم فاسدة

مصر مش ممكن تتحط في جيب حد..

واللي توزه نفسه  يعمل حاجة كده ولا كده

ها نجيب بوزه الأرض..

ونحطه تحت رجلينا..

واللي عملها مرة… يعملها ثاني..

//

هي دي مصر يا هيثم…

هي دي مصر يا مصريين.

هي دي مصر يا عالم.

 

Advertisements