بقلم المهندس هيثم أبو خليل

هي دي مصر يا وائل ….! 

 

 
 
 
 
كتب الدكتور النابه وائل عزيز علي مدونته القيمة
( عقل ونقل ومستقبل) مقالة   بعنوان :/
(هي دي مصر يا هيثم ) غلب عليها الطابع العاطفي لتأثر الدكتور بالغربة وحنينه للوطن وعلل سيادته كتابة هذه المقالة بحرصه علي الإتزان النفسي لي …
لا أعلم اليوم وبعد عام ونصف من نشر المقال أجدني ارد علي هذا المقال لأني اليوم علي يقين أن بداية الإصلاح والتغيير هي البعد عن الذكريات الجميلة وتشخيص الواقع بدقة لتحضير العلاج المناسب :
يقول الدكتور وأنا أرد عليه جملة جملة وعبارة عبارة …
يقول الدكتور عن الماضي وأنا أتكلم عن الواقع والحال :
 
 
مصر هي الشرف… والنضال والصحافة الحرة..
        مصر هي الخوف والسلبية والصحافة الموجهة والمكممة
        (عهد لم يقصف فيه قلم بل مكتبة أقلام ومنها جريدة الشعب وأفاق عربية والدستور الإصدار الأول قبل الإستئناس )
 
 
مصر هي ذكاء عيون أولاد المدارس بالمريلة الميري..
 
مصر هي ذكاء عيون أولاد المدارس الإنترناشيونال وإختفت المريلة الميري … أتحدي من يري مدرسة حكومية يتم بنائها الآن ..النظام باع التعليم للمدارس الخاصة والآن الجامعات الخاصة
 
مصر هي سيد درويش وأم كلثوم وأحمد فؤاد نجم..
مصر هي بعرور وشعبان وريكو
 
 
مصر هي الأزهر ومحمد رفعت وجامع السلطان حسن…
مصر هي الأزهر الحكومي والشيخ نعينع الذي إستفتح حفل بمناسبة نجاة الرئيس من محاولة إغتياله في أديس أبابا بالآية 155 من سورة الأنعام دون إحترام لعلامات وقف أو وصل أو اي شيء
(كتاب أنزلنه مبارك فأتبعوه واتقوا لعلكم ترحمون)
فرتل فضيلته مبارك فأتبعوه واتقوا لعلكم ترحمون
ولا تعليق ..
 
 
مصر هي الكونسرفتوار والمعهد الديني ومدرسة الراهبات…
مصر هي معهد الرقص الشرقي والمولات الجديدة
 
مصر هي أذان الفجر صوت وصورة في سيدنا الحسين…
مصر هي الأذان الإلكتروني القادم خلال شهور ودراويش ومجاذيب مسجد الحسين .,..
 
مصر هي القلعة وفم الخليج ومنارة إسكندرية… والسد العالي
 
مصر هي مصنع حديد عز وسيراميك كيلو باترا
مصر هي الهرم… ومعبد الكرنك… ومترو الأنفاق…
مصر هي لجنة السياسات والحزب الوطني ووزارة الداخلية
 
مصر هي القصر العيني … ومعهد الكبد.. ومركز الكلى…
مصر هي المستشفيات الاسثتثمارية ومستشفي سرطان الاطفال واحلي بزنس من حولها
 
مصر هي هيئة الطاقة النووية… ومركز البحوث …ومجمع اللغة العربية
 
مصر هي هيئة الطاقة النووية المعطلة ومركز البحوث الذي لا يقدم جديد ومجمع اللغة العربية المجمد
مصر هي مبرمجين عباقرة ومهندسين مبدعين.. ودكاترة ما جبتهومش ولادة
مصر هي للأسف أصبحوا قلة قليلة نتيجة تخريب التعليم وعندما يجدوا فرصة محترمة خارج مصر تفجر طاقتهم
 
مصر هي صنايعية جامدين قوي وأسطوات حريفة..ى
 
مصر هي صنايعية غشاشين واسطوات نصابين كله بالفهلوة والاونطة
مصر هي أطيب فلاحين وأشرف صعايدة و أذكى سواحلية..
  ……………أوافقك  علي دي فعلاً أطيب فلاحين وأشرف صعايدة بس أذكي سواحلية مش معاك
 
مصر هي الصحفيين الشرفاء والمفكرين العظام والمدونيين الأحرار
……………صحفيين شرفاء ندرة  ..كان ..فعل ماضي فين المفكرين دول …!؟
والمدونين الأحرار … ممكن ..!!
 
مصر هي كأس الأمم الإفريقية… وحسن شحاتة و محمد أبو تريكة
 
مصر هي الحظ والصدفة في الإنتصارات ودعاء الملايين ..ماتش فوق وعشرة تحت ولا يوجد نظام ولا إدارة ولا شفافية
 
 
 
مصر هي رأفت نخلة بيفطر في رمضان مع عم مصطفى..
كان زمان الآن النفوس مشحونة لأتفه الأسباب تحدث فتنة طائفية
 
مصر هي قرطاس ترمس على الكورنيش
قرطاس الترمس بقي بجنيه …!!
 
مصر هي فندق العلمين وقصر محمد علي..
كلمني عن الحاضر شوية …والمستقبل ..محمد علي …مين ..!!!
 
 
مصر هي كيلو سمك مشوي في أبو قير..
سمك مزارع وحياتك مش بحر …!!
 
مصر هي القناطر الخيرية… وترعة الإسماعيلية… وبحيرة ناصر..
يا عم وائل حتتكلم عن الماضي إلي متي …؟
 
مصر هي ساعي المصلحة بيضحك وهو بيحط الجنيه في جيبه..
وهو بيضحك وهو بيحط الجنيه اللي ضربه من الراجل الغلبان علشان يوريه السكة في المصلحة …!
 
مصر هي الشاويش واخذ جنب وبيفطر ساندوتش فول
بيفطر بعد ما علق كام واحد غلبان علي الفلكة في سلخانة قسم الشرطة
 
مصر هي المجند الدفعة اللي بيتشعبط فوق القطر
ما بقاش فيه مجندين كله تأجيل أو إعفاء …
 
مصر هي أم بدوي بتطش الطعمية في زيت ما اتغيرش من شهرين
صح الله ينور …!!
 
مصر هي عسكري بيرفع العلم فوق سينا… وبيفتح الحدود لأخوه الفلسطيني
بيرفع العلم بس…. لكن ثلثين سيناء منزوعين السلاح عليهم شرطة وحرس حدود بالعدد …!!
وحدود إيه إللي بيفتحها إنت بتصدق كلام الأخبار ده بيفتح فين وفين وبيدخل إيه …!!
 
مصر هي شلبي بينادي ع البت حميدة تقابله ع القمة…
بيقابلها الآن علي النت وبيعملوا قلة أدب …!
 
مصر هي جمالات بترمي ميه ع العيال من البلكونة…
بيحصل ….صح كده …
 
مصر هي كيلو فسيخ مبطرخ … وفحل فصل … وكوباية شاي حبر
موجود …
 
مصر هي مركب بمجدافين وسط النيل..
موجود …
 
 
مصر هي الجرسون بيقول الزبون: خليها علي المرة دي…
بيفتح معاه سكة علشان يشوف ميته علشان البقشيش مش جدعنة خلي بس الزبون يقوله طيب ماتزعلش نفسك ….عليك المرة دي
 وشوف الجرسون حيعمل إيه ..!!!
 
 
مصر هي ميكروباس زحمة… وهي ليموزين فخم على كوبري ستة أكتوبر..
طبعاً أحلي تفاوت طبقي الآن …بس ليموزين فخم رايح الكامبوند في الرحاب أو السلمانية
 
وعيادة تأمين صحي… بتخدم عشرين مليون..
خدمة زي الطين …؟
 
وطابور عيش طويـــــــــــــــــل….
طويييييييييييييييييل قوي يا دكتور وائل …
 
ودعاء ليلة القدر في جامع عمرو بن العاص…
 
 بصراحة رائع والشيخ جبريل ربنا يبارك فيه ….
هو ده إللي لسه بخيره وموجود
 
مصر هي مستشفى الشاطبي..
مستشفي الشاطبي ..تعالي أكلمك عليها أنا أختي الكبيرة أخصائية نساء وولادة يدوبك 7 أطفال ماتوا في الحضانة نتيجة الإهمال العام قبل الماضي
 
وشط العصافرة…
أتأجر لمجموعة بلطجية الكرسي ب5 جنيه والشمسية ب 7 جنيه والترابيزة ب5 جنيه
 
والمنتزه برضه…
الدخول ب 6 جنيه
 
مصر هي الملاية اللف..
إنسي يا وائل ما فيش …. بح ….
 
وهي السواريه والاسموكن
موجود
 
 
مصر هي الغالي والرخيص..
صح
 
مصر هي الغني والفقير…
صح
 
مصر هي المدينة والنجع…
صح
 
مصر هي النظيف والوسخ…
صح
 
مصر هي القديم والجديد..
أكيد
 
مصر هي الكبير والصغير..
طبعاً
مصر هي الحلو والوحش..
 
وما فيكيش حاجة وحشة يا مصر..
لا طبعاً … فيها حاجات كثيرة وحشة … خليك موضوعي يا دكتور وائل …
//
 
مصر هي مارينا وهي الأنفوشي…
وإحنا مالنا بمارينا دي للكبرات الله يسهل لهم …
 
مصر هي 10 رمضان: المعركة والمدينة
كده دخلنا في كلام خطب وكلام إنشاء
 
مصر هي 6 كتوبر: النصر والمصانع
مصر هي أمي ….!
 
مصر هي السكة الحديد وهي الطريق الزراعي
لازم يكون في سكة حديد ولازم يكون في زراعة وطريق حولها …!
 
مصر هي السيدة زينب وهي مدينة الرحاب
عادي …ما هو ده تطور الحاجة الساقعة ..!!
 
مصر هي لوكاندة الفردوس وهي الفور سيزونز
اللوكاندة هدموها وعملوا مكانها برج …
 
مصر هي قناة السويس وهي توشكي
توشكي أفشل مشروع في تاريخ مصر …لا  يا دكتور عدت عليك دي … توشكي …!
 
مصر هي ساقية الصاوي وهي الأوبرا
الساقية زي الفل … لكن الأوبرا لفئة معينة وفقط …
 
مصر هي مدرسة السنية وهي مدرسة الليسيه
إنت قديم قوي يا دكتور …. أمريكان وفيوتشر سكوووووووول ومناهج أي جي …
 
مصر هي دار القضاء العالي وساعة الجامعة والقصر العيني
إنت ما عندكش إلا القصر العيني ..ما تغير يا دكتور … فعلاً القصر العيني في إيد المصري عجبة …!!
 
مصر هي الشيخ الشعراوي والغزالي والقرضاوي
نفتخر ونشرف بهم
 
//
 
مصر كلها بتاعتنا… مش بتاعتهم
لا معلش … بقت بتاعتهم كلها … وإحنا غرب …
 
مش هانسيب أي حته منها لأي حد..
مش بمزاجك …. بتتباع يا معلم … وحضرتك مش حاسس بأي حاجة …
 
 
 
مصر باللي فيها واللي عليها بتاعتنا احنا
 
… مش بتاعته ولا بتاعتهم
إنت حتقضيها شعر …. بتاعتهم وإللي عندك إعمله …!
 
لو بيوتها متربة ها ننفضها…
نفض للصبح … إنت عايز منفضة في طول برج القاهرة …!
 
لو شوارعها مكسرة ها نصلحها..
تصلح إيه ولا إيه ….!
 
لو صوتها مبحوح هانديها يانسون…
ههههههههههه والله أضحكتني … حتعمل براد الينسون ده فين … !!!
 
لو ايديها مكسورة ها نجبسها…
دي مش إيديها …دي رقبتها إللي مكسورة …؟
 
لو عندها برد ها نشربها عسل ولمون..
ده مش برد يا دكتور … تشخيصك خطأ …
ده سرطان …. ولازم يستأصل علشان مصر تعيش …
 
لو بتزك ها نسندها..
للأسف كانت بيتزك … الآن مكسحة … فينك من زمان …؟
 
لو ناسها زهقت ها نطبطب عليهم..
حطبطب علي مين ولا مين … أنت محتاج طبطابة آلي ..!!
 
لو علماءها طفشت ها نرجعهم…
ممكن يرجعوا …بس الحال يتصلح … أنا عارف المصري أصيل وحب بلده عنده كبير جداً
 
لو عيالها جعانة ها نشبعهم..
ياريت بدل الفضائح وإعلانات الشحاتة طول اليوم في التليفزيون
 
//
 
مصر مش عيلة…
لا عليلة … عائلة آل مبارك …
 
مصر مش شلة حكم فاسدة
لا شلة حكم فاسدة بزعامة أحمد عز
 
مصر مش ممكن تتحط في جيب حد..
لا محطوطة في جيب جمال ولجنة السياسات
 
واللي توزه نفسه يعمل حاجة كده ولا كده
 
ها نجيب بوزه الأرض..
إنت حتمشيها كلام حنجوري وعنتريات …!
 
ونحطه تحت رجلينا..
بأمارة إيه …!!!
 
واللي عملها مرة… يعملها ثاني..
مستني المرة الثانية بفارغ الصبر …!
 
//
 
هي دي مصر يا هيثم…
لا دي مصر قديماً يا عم وائل مش الآن ….
العنوان خطأ …
هي دي مصر زمان يا هيثم … كانت تمشي
 
هي دي مصر يا مصريين.
عارفينها كويس ….
 
هي دي مصر يا عالم.
العالم عارفنا كويس ….
إحنا إللي مش عارفين نفسنا يا دكتور وائل ….!!!!!
 
رابط موضوع هي دي مصر يا هيثم علي مدونة الدكتور وائل عزيز
 
 
 
Advertisements